Sekolah Menengah Kejuruan Karya Nasional (SMK-Karnas) Kuningan gawe bareng jeung PT. Fukusuke Kogyo Indonesia, anyar-anyar ieu ngayakeun test rekrutmen calon tanaga gawe pikeun ditempatkan di eta pausahaan.

Test rekrutmen calon tanaga gawe nu dilaksanakeun di Kampus SMK Karnas, diiluan ku 66 peserta diantarana 45 calon tanaga gawe wanoja jeung 21 lalaki lulusan sawatara SMA jeung SMK boh negeri boh swasta sa-Kabupaten Kuningan.

Kepala SMK Karnas Kuningan, Ir. H. Yepri Esa Tri Jaka, M.Pd, dibaturan ku panitia bursa kerja, Yayat, nyebutkeun, saenyana pihak pausahaan nu bagerak dina widang industri plastik di Bekasi, ngabutuhkeun tanaga gawe reana 100 urang, diantarana 80 urang tanaga gawe wanoja jeung 20 urang tanaga gawe lalaki.

“Kumargi di SMK Karnas teu gaduh lulusan istri, nya ngalibetkeun lulusan-lulusan ti sakola nu sanes da sesah milari calon padamel istri,” ceuk Yepri. *